Агар чипта аллакай харида шуда бошад, чӣ тавр метавонам бағоҷро илова кунам
Баъди хариди чипта низ бағоҷро илова кардан мумкин аст. Барои ин рамзи бандкунӣ ё рақами чипта, насаби мусофир ё почтаи электрониеро, ҳангоми бандкунӣ нишон дода шудааст, бояд бидонед.
Ба чиптаи харидашуда бо чанд роҳ метавон бағоҷ илова кард:
- Нахуст, саъй кунед, ки бағоҷро аз утоқи шахсӣ дар сомонаи интиқолдиҳанда ё бо занг задан ба маркази тамос илова намоед. Агар бағоҷ тариқи ширкати ҳавопаймоӣ илова карда нашавад, ба фурӯшанда муроҷиат кунед. Унвони фурӯшанда дар чипта ҳаст.
- Ба сомонаи фурӯшанда даромада, бубинед, ки оё функсияи «Илова кардани бағоҷ» ҳаст ё на. Барои даромадан рақами бандкунӣ аз расид, насаби мусофир ё почтаи электроние, ки ҳангоми барасмиятдарории чипта нишон дода шуда буд, лозиманд.
- Агар бағоҷ дар сомона илова карда нашавад, тавассути почтаи электронӣ, нусхаи робитаи мутақобил ё телефон, ба фурӯшанда муроҷиат кунед. Барои дархост гузоштан рақами бандкунӣ, насаби шумо ва почтаи электроние, ки ҳангоми барасмиятдарорӣ нишон дода будед, лозиманд.
- Ҳамчунин, бағоҷро метавонед дар мизи бақайдгирӣ дар фурудгоҳ харидорӣ кунед, аммо маъмулан, ин қиматтар аст.
Чӣ тавр бағоҷро танҳо барои як мусофир илова кардан мумкин аст
Дар як бандкунӣ хусусиятҳои чиптаи ҳамаи мусофирон бояд якхела бошад. Яъне ҳамаи чиптаҳо бояд дорои бағоҷ бошанд, ё баръакс, бидуни бағоҷ.
Агар танҳо барои як мусофир бағоҷ лозим бошад, ду бандкунии алоҳида ташкил кунед: яке бе бағоҷ ва дуюмӣ бо бағоҷ. Ин вариант мумкин аст, агар ҳар дуи мусофирон калонсол бошанд — калонтар аз 12-сола ё баъзан, аз 16-сола, вобаста ба талаботи ширкати ҳавопаймоӣ.
Варианти дувум: чиптаҳоро танҳо бо бори дастӣ гирифта, баъди харид барои яке аз мусофирон бағоҷ илова кардан мумкин аст.
Андоза ва вазни ҳадди аксари бағоҷеро, ки бо худ гирифтан мумкин аст, дар куҷо метавон дид
Меъёри интиқоли бағоҷ дар ҳар ширкати ҳавопаймоӣ фарқ мекунад. Дар марҳилаи ҷустуҷӯи чипта, агар фурӯшанда чунин маълумотро фароҳам оварда бошад, мо нишон медиҳем, ки ба чиптаи шумо чанд килограмм бағоҷ шомил аст.
Агар чипта бағоҷ надошта бошад, муайян мекунем, ки барои хариди он чӣ қадр маблағ лозим аст.
На ҳамаи фурӯшандагон ба мо маълумот оид ба бағоҷро пешниҳод мекунанд. Андозаи аниқ ва вазни муайяни бағоҷро дар тарофаи мавриди назар ҳангоми хариди чипта дар сомонаи фурӯшанда дидан мумкин аст. Агар фурӯшанда оид ба вазни аниқи бағоҷ ба мо маълумот дода бошад, мо ҳатман онро нишон медиҳем.
Қоидаҳои интиқоли бори дастиро дар куҷо дидан мумкин аст
Дар расиди хатсайр ва ё сомонаи ширкати ҳавопаймоӣ
Дар расиди хатсайри шумо теъдод, андоза ва вазни ҳадди аксари бағоҷ ва бори дастӣ навишта шудааст. Агар он ҷо маълумоти кофӣ набошад, ба сомонаи интиқолдиҳанда гузашта, бахши қоидаҳои интиқоли бағоҷро бубинед.
Агар бағоҷи калонҳаҷмро интиқол доданӣ бошед, бо ширкати ҳавопаймоӣ тамос гирифта, тамоми шароит ва ҷузъиёташро муҳокима кунед.
Дар бағоҷ ва бори дастӣ чиро интиқол додан мамнӯъ аст
- Моддаҳои тарканда ё зуд оташгиранда: тамоми навъҳои фейерверкҳо, лавозимоти ҷангӣ, сӯзошвориҳои оташгиранда (дизел, бензин), гӯгирд ва оташгиронакҳо, ҳалкунандаҳои рангҳо ва рангҳо дар қуттиҳои аэрозолӣ, машруботе, ки дарсади спирт дар таркибашон бештар аз 70% бошад.
- Моддаҳои заҳрнок, каустикӣ ва зангзананда, аз ҷумла ишқор ва кислотаҳо, баллончаҳои газӣ, симоб, хлор, моддаҳои аз ҷиҳати биологӣ хатарнок (масалан, вирусҳо), заҳру химикатҳо, хокаҳои сафедкунанда ва пероксидҳо, моддаҳои радиоактивӣ.
- Электрошок ва яроқҳои отшафишон, ба истиснои ҳолатҳои махсус. Ширкати ҳавопаймоӣ яроқи оташфишонро танҳо дар ҳолате интиқол дода метавонад, ки мусофир барои нигоҳдорӣ ва гирифта гаштани он иҷозатнома дошта бошад. Ҳангоми ҳамлу нақл яроқ танҳо дар бағоҷ, дар шакли холӣ ва ба қисмҳо ҷудошуда ва дар қуттии махсусе, ки барои он пешбинӣ шудааст, нигоҳ дошта мешавад. Зимнан, дар бори дастӣ ҳамлу нақли бозичаҳое, ки ба яроқ монандӣ доранд, ҳарчанд безарар ҳам бошанд, мамнӯъ аст.
- Воситаҳои нақлиётие, ки батареяҳои литий-ионӣ доранд: самокатҳои барқӣ, гироскутер ё моночарх.
Ҳатман бо рӯйхати маҳсулот, ашё ва дорувориҳои ҳамлу нақлашон мамнӯъ шинос шавед, чунки қоидаҳои баъзе кишварҳо аниқ шуморо ба ҳайрат меоранд. Масалан, гирифта баровардани марҷон (коралл) аз Таиланд мамнӯъ аст (барои ин кор ба зиндон афтодан мумкин!) ва ба АМА овардани шарбати сулфа барои кӯдакон мумкин нест, агар дар таркибаш кодеин дошта бошад.
Маҳдудиятҳои дигар барои бори дастӣ
Дар маҷмӯъ, дар бори дастии худ на бештар аз як литр моеъот гирифта метавонед, аммо ҳаҷми ҳар як шишача набояд аз 100 мл зиёдтар бошад. Ин маҳдудият ба моеъоте, ки дар дюти фри харида шудааст, дахл надорад. Бояд дар назар дошт, ки ҳангоми интиқолҳо мумкин аст аз шумо хоҳиш кунанд, ки чизҳои аз дюти-фри харидаатонро ба бағоҷ гузоред.
Ғизои кӯдакона истисно аст. Онро ба шишачаҳои 100 миллилитрӣ тақсим кардан шарт нест. Агар ҳамроҳи кӯдак парвоз дошта бошед, ғизоро метавонед бо худ гиред.
Вобаста ба ҳамлу нақли доруҳо — беҳтараш пешакӣ қоидаҳои гумрукии кишвари мақсадро омӯзед ва ё аз сафоратхона машварат пурсед. Баъзе доруҳое, ки дар кишвари шумо мамнӯъ нест, мумкин аст дароварданаш ба кишварҳои дигар мамнӯъ бошад ва баръакс. Барои интиқоли сӯзандоруҳо ва сӯзанҳои иловагӣ бояд бо худ ҳуҷҷати тиббие дошта бошед, ки зарурати онҳоро ҳангоми парвоз тасдиқ карда тавонад.
Ҳамчунин, ба бори дастӣ ҳама гуна ашёе, ки боиси осеб шуда метавонад, роҳ дода намешавад, масалан, асбобҳои бурандаву шикофкунанда (қайчиҳо, кордҳо, асбобҳои маникюр, мурваттоб ва дигар асбобҳои корӣ).
Ҳамлу нақли павербанкҳо мумкин аст, агар қувваи онҳо аз 160 Вт/с зиёд набошад. Барои таскини хотир, сомонаи интиқолдиҳандаро бубинед, чунки эҳтимолан, қоидаҳои иловагӣ низ ҳаст.
Дар бори дастӣ гузаронидани аэрозолҳо, аз ҷумла дезодорантҳое, ки нишонаи «оташгиранда» доранд, ҳарчанд қуттиаш аз 100 мл камтар ҳам бошад, мумкин нест. Таҷҳизоти варзиширо низ бо худ ба салони ҳавопаймо гирифта наметавонед. Лижа, сноуборд, дучарха, тахтаи сёрфинг ва васоили ғаввосиро метавонед ба осонӣ ба бағоҷ супоред. Баъзан, ширкатҳои ҳавопаймоӣ дар мавсими хос ҳамлу нақли ройгони таҷҳизоти варзиширо дар баробари бағоҷ ба роҳ мемонанд. Бо шароити ҳамлу нақл пешакӣ дар сомонаи интиқолдиҳанда шинос шавед.
Агар вобаста ба интиқоли ягон чизи ғайриодӣ шубҳа дошта бошед, ки шояд иҷозатномаҳои иловагӣ лозим аст ва ё мумкин аст дар сарҳад онро мусодира кунанд, пешакӣ бо ширкати ҳавопаймоӣ машварат кунед. Қоидаҳои ҳамлу нақлро дар сомонаи интиқолдиҳанда омӯзед ва дар ҳолатҳои зарурӣ ба хадамоти дастгирии онҳо муроҷиат карда, тафсилоташро муайян намоед.